Punjabi PSSSB Practice 15

ਕੀ ਅਸੀਂ ਕਦੇ ਸੋਚਿਆ ਹੈ ਕਿ ਅਸੀਂ ਰੋਜ਼ਾਨਾ ਜੀਵਨ ਵਿੱਚ ਰਸਾਇਣਾਂ ਦੀ ਬੇਲੋੜੀ ਅਤੇ ਬੇਓੜਕ ਵਰਤੋਂ ਕਰ ਰਹੇ ਹਾਂ? ਇਨ੍ਹਾਂ ਦੇ ਮਾਰੂ ਪ੍ਰਭਾਵਾਂ ਬਾਰੇ ਸਾਨੂੰ ਕਿੰਨਾ ਪਤਾ ਹੈ? ਪੁਰਾਣੇ ਸਮੇਂ ਵਿੱਚ ਮਨੁੱਖ ਕੁਦਰਤੀ ਚੀਜ਼ਾਂ ਦੀ ਵਰਤੋਂ ਕਰਦਾ ਸੀ ਅਤੇ ਕੁਦਰਤ ਦੇ ਨੇੜੇ ਹੋਣ ਕਰਕੇ ਤੰਦਰੁਸਤ ਰਹਿੰਦਾ ਸੀ। ਅੱਜ ਰਸਾਇਣਾਂ ਦੀ ਅਤਿਅੰਤ ਵਰਤੋਂ ਨੇ ਬਿਮਾਰੀਆਂ ਵਿੱਚ ੨੫% ਵਾਧਾ ਕੀਤਾ ਹੈ। ਸਵੇਰੇ ਉੱਠਣ ਤੋਂ ਲੈ ਕੇ ਰਾਤ ਨੂੰ ਸੌਣ ਤੱਕ ਅਸੀਂ ਰਸਾਇਣਾਂ ਨਾਲ ਘਿਰੇ ਰਹਿੰਦੇ ਹਾਂ। ਸਵੇਰੇ ਸਭ ਤੋਂ ਪਹਿਲਾਂ ਅਸੀਂ ਦੰਦ ਸਾਫ਼ ਕਰਦੇ ਹਾਂ। ਟੂਥਪੇਸਟ ਵਿੱਚ ਸੋਡੀਅਮ ਫਲੋਰਾਈਡ ਵਰਗਾ ਰਸਾਇਣ ਹੁੰਦਾ ਹੈ। ਕੀ ਇਹ ਸੱਚ ਨਹੀਂ ਕਿ ਇਹ ਰਸਾਇਣ, ਜੇ ਨਿਗਲ ਜਾਵੇ, ਤਾਂ ਜਾਨਲੇਵਾ ਬਿਮਾਰੀਆਂ ਦਾ ਕਾਰਨ ਬਣ ਸਕਦਾ ਹੈ? ਪੁਰਾਣੇ ਸਮੇਂ ਵਿੱਚ ਨਿੰਮ ਜਾਂ ਕਿੱਕਰ ਦੀ ਦਾਤਣ ਨਾਲ ਦੰਦ ੧੦੦% ਸਾਫ਼ ਅਤੇ ਚਮਕੀਲੇ ਰਹਿੰਦੇ ਸਨ। ਨਹਾਉਣ ਲਈ ਵਰਤੇ ਜਾਣ ਵਾਲੇ ਰੰਗ-ਬਰੰਗੇ ਸਾਬਣ ਖੁਸ਼ਬੂਆਂ ਅਤੇ ਰਸਾਇਣਾਂ ਨਾਲ ਭਰੇ ਹੁੰਦੇ ਹਨ। ਇਹ ਸਰੀਰ ਦੀ ਕੁਦਰਤੀ ਨਮੀ ਖਤਮ ਕਰ ਦਿੰਦੇ ਹਨ। ਨਤੀਜੇ ਵਜੋਂ, ਅਸੀਂ ਬਾਡੀ ਲੋਸ਼ਨ ਦੀ ਵਰਤੋਂ ਕਰਦੇ ਹਾਂ। ਟੈਲਕਮ ਪਾਊਡਰ ਵਿੱਚ ਮੌਜੂਦ ਰਸਾਇਣ ਸਰੀਰ ਦੇ ਪਸੀਨੇ ਵਾਲੇ ਮੁਸਾਮਾਂ ਨੂੰ ਬੰਦ ਕਰ ਦਿੰਦੇ ਹਨ, ਜਿਸ ਨਾਲ ਬਿਮਾਰੀਆਂ ਦਾ ਖਤਰਾ ੨੫% ਤੱਕ ਵਧ ਜਾਂਦਾ ਹੈ। ਵਾਲਾਂ ਲਈ ਸੈਂਪੂ ਵੀ ੩ ਕਿਸਮਾਂ ਵਿੱਚ ਮਿਲਦੇ ਹਨ: ਸਿੱਕਰੀ, ਝੜਦੇ ਵਾਲਾਂ, ਅਤੇ ਚਿੱਟੇ ਵਾਲਾਂ ਲਈ। ਸੈਂਪੂ ਤੋਂ ਬਾਅਦ ਕੰਡੀਸ਼ਨਰ ਵਰਤਿਆ ਜਾਂਦਾ ਹੈ, ਪਰ ਇਹ ਰਸਾਇਣ ਵਾਲਾਂ ਅਤੇ ਖੋਪੜੀ ਨੂੰ ਨੁਕਸਾਨ ਪਹੁੰਚਾਉਂਦੇ ਹਨ। ਔਰਤਾਂ ਚਿਹਰੇ ਦੀ ਸੁੰਦਰਤਾ ਲਈ ਅਨੇਕਾਂ ਉਤਪਾਦ ਵਰਤਦੀਆਂ ਹਨ। ਇਹਨਾਂ ਵਿੱਚ ਮੌਜੂਦ ਘਾਤਕ ਰਸਾਇਣ ਚਮੜੀ ਨੂੰ ਢਿੱਲਾ ਕਰਕੇ ਕੁਦਰਤੀ ਚਮਕ ਖਤਮ ਕਰ ਦਿੰਦੇ ਹਨ। ਕੀ ਇਹ ਦੁਖਦਾਈ ਨਹੀਂ ਕਿ ਔਰਤ ਸਾਰੀ ਉਮਰ ਇਹਨਾਂ ਉਤਪਾਦਾਂ ਦੀ ਗੁਲਾਮ ਬਣ ਜਾਂਦੀ ਹੈ? ਅਸਲੀਅਤ ਇਹ ਹੈ ਕਿ ਪੂੰਜੀਵਾਦੀ ਯੁੱਗ ਵਿੱਚ ਰਾਸ਼ਟਰੀ ਅਤੇ ਬਹੁਰਾਸ਼ਟਰੀ ਕੰਪਨੀਆਂ ਦੀ ਭਰਮਾਊ ਇਸ਼ਤਿਹਾਰਬਾਜ਼ੀ ਨੇ ਇਹਨਾਂ ਫਾਲਤੂ ਉਤਪਾਦਾਂ ਨੂੰ ਸਾਡੀ ਜੀਵਨ ਸ਼ੈਲੀ ਵਿੱਚ ਸ਼ਾਮਲ ਕਰ ਦਿੱਤਾ। ਕੀ ਅਸੀਂ ਇਹਨਾਂ ਰਸਾਇਣਾਂ ਦੀ ਵਰਤੋਂ ਘਟਾ ਕੇ ਕੁਦਰਤੀ ਜੀਵਨ ਵੱਲ ਨਹੀਂ ਮੁੜ ਸਕਦੇ? ਸਾਨੂੰ ਚੇਤਨ ਹੋਣ ਦੀ ਲੋੜ ਹੈ, ਤਾਂ ਜੋ ਅਸੀਂ ਆਪਣੀ ਤੰਦਰੁਸਤੀ ਅਤੇ ਕੁਦਰਤੀ ਸੁੰਦਰਤਾ ਨੂੰ ੧੦੦% ਬਚਾ ਸਕੀਏ!